Wäljkiimen tu Risem Schöljs hüüsesid

Ma jü heer hüüsesid wan we foon üüs schölj ferteele än da müülje beschriwe, wat we hääwe. Uk weer we önj e uugensteblak ma årbe, schal beschraawen wårde. Schal deer mör tu, san we åltens paroot mör tu ferteelen.

Risum Skole / Risem Schölj as en grün- än gemiinschaftsschölj än lait sü ambai 5 km önjt söödriie foon Naibel, önjt weesten foon e gemiinde Risem-Lonham (Nordfraschlönj). Jü as iin foon da 47 dånsche schoule önj südslaswik. Deer as en mase plååts trinamt schölj ma maning möölikhäide for sport än spal.

Üüs schölj as eefter dåt Slaswik-Holstiins schöljgesäts ’staatlich anerkannt’ än bestoont üt en grünschölj än en gemiinschaftsschölj ma ütloogerte gemiinschaftsklase bit tu e 8. klas. Ma en önjsäken tu e schöljferiin as et uk möölik heer bit tu e 9. klas tu bliwen. Deerfor koon huum ma en gemiinschaftstüüchnis eefter e 8. klas unti ma en gemiinschafts- öifslitstüüchnis eefter e 9. klas e schölj-besäk öifslite.

omskopic

Üüs schölj hiirt tu da latje schoule bane for e schöljferiin (skoleforeningen) än heet önj e uugensteblak 34 schoulere ferdiild aw tri klase (1.-2. klas,3.-5. klas og 6.-9. klas). En schöljliider än 4 liirere sörie for en briidj feeklik ours uk indiwiduäl duuchtimåågen foon da schoulere önj ååle klase. Deerbai wårde ja stiped foon en SFO-maårber, en hüsmäister än tou riinmåågwüste.

Risem Schölj läit gruten wjard aw et tuhuupeårben ma da ålerne. We hääwe en interäsiirden ålernekris, wat et schölj än åles wat jü önj e warkeldäi forheet, stiped. Önj di warkeldäis-unerrucht wårt deer wjard aw läid, dåt da liirere tuhuupe årbe än dåt di unerrucht schaftewis feekourgripend än projäktoriientiird as. Di unerrucht foon moundi bit fraidi as en mången foon klaseunerrucht, flooseårbe än änkeltunerrucht.

E schölj läit uk wjart aw en europäisch schuchte foont schöljlaawen än heet kontakte än uk tuhuupeårbe ma maning oudere ätnisch-kulturäle manerhäide önj Europa.

Risem Schölj as gödj fersöörid ma ‚it-tächnik’, sü dåt we uk ma da ünlike floose ourt internät än ma ii-mäil tuhuupeårbe koone. Seelew hääwe we en schöljintern neetwärk, sü dåt schoulere än liirere foon ååle klaserööminge üt ma ‚it’ årbe koone.

Üüs schölj heet en huug aktiiwitääts-niwoo am uk keere büte for e unerrucht for ålerne än schoulere önj e gung tu seeten. Tubai üüs tuhuupeårbe ma jü dånsch manerhäid as Risem Schölj uk en tradiirt drååwstää for da frasche. Frasch wårt likberuchtiid tubai dånsch än tjüsch liird än unerruchtet. Dåt tuhuupeårbe made da biise manerhäide heer önjt schölj bane än büte for e unerrucht as ütglikd än entspånd.